Qurani-Kərim yandırıldı: İsveç qarışdı

Həddindən artıq sağçı Danimarka-İsveç vətəndaşı Rasmus Paludan Quranı yandırdıqdan sonra son 3 gündə bir çox şəhərdə zorakılıqlar başlayıb.

İsveçdəki Stram Kurs Partiyasının lideri, ifrat sağçı Danimarka-İsveç vətəndaşı Rasmus Paludanın cümə axşamı Linköpinq şəhərində bir meydanda Qurani-Kərimi yandırmasından sonra ölkənin bir çox şəhərində zorakılıqlar başlayıb.

İfrat sağçılarla əks-etirazçılar arasında baş verən hadisələr zamanı avtomobillər yandırılıb, çoxlu sayda insan, o cümlədən polislər yaralanıb. Şərqdəki Norrköpinq şəhərində polisin nümayişçiləri dağıtmaq üçün açdığı xəbərdarlıq atəşi nəticəsində 3 nəfərin yaralandığı bildirilib. Hadisələr zamanı çoxlu avtomobilin yandırıldığı, ən azı 17 nəfərin saxlanıldığı bildirilib.

Ötən gün ölkənin cənubundakı Malmö şəhərində Stram Kurs tərəfdarlarının təşkil etdiyi mitinq zamanı avtobus da daxil olmaqla bir çox avtomobil yandırılıb. Ötən həftə baş verən hadisələrdə 16 polis əməkdaşının yaralandığı, çoxlu sayda polis maşınının yandırıldığı bildirilib.

İraq və İran Qurana edilən çirkin hücuma görə İsveçə nota veriblər. Digər tərəfdən, Danimarkada irqçilik də daxil olmaqla bir çox cinayətə görə 2020-ci ildə bir ay həbs cəzası alan Paludanın Fransa və Belçika ilə yanaşı, digər Avropa ölkələrində də bənzər Quran yandırma aksiyaları planlaşdırdığı bilinir.