Yunanıstanda azı 57 nəfərin həyatını itirdiyi qatar qəzasından sonra etirazlar davam edir. Dəmiryolçuların çağırışı ilə paytaxt Afina və bir çox şəhərlərdə etiraz nümayişləri keçirilib.
Yunanıstanda azı 57 nəfərin ölümü ilə nəticələnən qatar qəzasından sonra özəlləşdirmə siyasətlərinə və hökumətə qəzəb artır. Dəmiryolçuların çağırışı ilə paytaxt Afina və bir çox şəhərlərdə yenidən kütləvi etiraz aksiyaları keçirilib. “Qətl, qəza deyil”, “bizim ölülərimiz, sənin qazancın” kimi şüarlarla küçələri dolduran on minlərlə insan siyasi məsuliyyət daşıyanların məsuliyyətə cəlb olunmasını tələb edib.
Paytaxt Afinada, parlament binası ilə üzbəüz Sintaqma meydanında keçirilən mitinqə dəmiryolçular, PAME kimi həmkarlar ittifaqları, solçu siyasi partiya və təşkilatlar, gənclər təşkilatları və tələbə birlikləri qatılıb. Mitinqdə “Bu cinayət ört-basdır edilməyəcək – bütün ölülərin səsi olaq” şüarı və ümumi tətil çağırışları gündəmə gəlib.
“Prin” qəzetinin xəbərinə görə, həlak olanların xatirəsi bir dəqiqəlik sükutla yad edilən mitinqdə çıxış edən dəmiryolçular onlara hökumətlər tərəfindən uzun müddətdir səslənən və məhəl qoymayan tələblərini xatırladıblar. Ölənlər üçün səmada yüzlərlə qara şar qalıb. Mitinq dağılarkən polisin meydana gözyaşardıcı qazla müdaxilə etdiyi öyrənilib.