Nazarbayev: Beynəlxalq dəmir yolu xətti əlaqələrimizi gücləndirəcək Qazaxıstan prezidenti Nursultan Nazarbayev Türkmənistanın xarici işlər naziri və Nazirlər Şurasının sədr müavini Rəşid Meredovu qəbul edib.
Qazaxıstan Rəyasət Heyətindən verilən açıqlamada görüşdə çıxış edən prezident Nazarbayev bildirib ki, Qazaxıstan-Türkmənistan-İran dəmir yolu xətti 3 ölkə arasında əlaqələri daha da gücləndirəcək. “Türkmənistanla əlaqələrimiz həm siyasi, həm də iqtisadi cəhətdən inkişaf edir. Biz bundan sonra bu əlaqələri gücləndirmək istəyirik. “Tamamlanma mərhələsində olan Qazaxıstandan başlayan, Türkmənistan və İran üzərindən Fars körfəzinə qədər uzanan dəmir yolu xətti layihəsi çox əhəmiyyətlidir”. Nazarbayev bəyan edib ki, layihənin başa çatması ilə üç ölkə arasında ticarət əlaqələri yeni səviyyəyə qalxacaq.
Türkmənistanın xarici işlər naziri Meredov Türkmənistan Prezidenti Qurbanqulu Berdiməhəmmədovun salamlarını çatdırıb və Qazaxıstan-Türkmənistan-İran dəmir yolu layihəsi haqqında məlumat verib. Nazir Meredov iki ölkə arasında əlaqələrin bir çox sahələrdə uğurla inkişaf etdiyini qeyd edib.
Nazarbayev və Meredov ikitərəfli münasibətləri, eləcə də ölkələri maraqlandıran beynəlxalq məsələləri müzakirə ediblər.
2007-ci ildə təməli qoyulan Qazaxıstan-Türkmənistan-İran dəmir yolu layihəsi tamamlanma mərhələsinə çatıb. Layihənin payızda başa çatdırılması gözlənildiyi halda, bu müddət ərzində Qazaxıstan prezidenti Nazarbayevin Türkmənistana səfəri gözlənilir. Orta Asiyanı Fars körfəzinə daşıyacaq layihə region ölkələrinin yük daşımalarını xeyli asanlaşdıracaq.
Şərh yazan ilk kişi olun